Last Updated:
விராட் கோலி 25 பந்துகளில் 5 சிக்ஸர்கள் மற்றும் 2 பவுண்டரிகளுடன் 43 ரன்களும், தேவ்தத் படிக்கல் 19 பந்துகளில் 30 ரன்களும் எடுத்து ஜேசன் ஹோல்டர் பந்துவீச்சில் அடுத்தடுத்து ஆட்டமிழந்தனர்
ஐபிஎல் 2026 (IPL 2026) தொடரின் மிக முக்கிய கட்டமான முதலாவது குவாலிஃபையர் (Qualifier 1) சுற்றில், ராயல் சேலஞ்சர்ஸ் பெங்களூரு (RCB) மற்றும் குஜராத் டைட்டன்ஸ் (GT) ஆகிய அணிகள் தர்மசாலாவில் உள்ள இமாச்சலப் பிரதேச கிரிக்கெட் சங்க மைதானத்தில் விளையாடி வருகின்றன.
இந்த போட்டியில் டாஸ் வென்ற குஜராத் டைட்டன்ஸ் அணியின் கேப்டன் சுப்மன் கில் முதலில் பந்துவீச்சைத் தேர்வு செய்தார். அதன்படி, முதலில் பேட்டிங் செய்யக் களம் இறங்கிய ராயல் சேலஞ்சர்ஸ் பெங்களூரு அணி, நிர்ணயிக்கப்பட்ட 20 ஓவர்கள் முடிவில் 5 விக்கெட்டுகளை இழந்து 254 ரன்கள் என்ற இமாலய ஸ்கோரைக் குவித்து, குஜராத் அணிக்குக் கடினமான இலக்கை நிர்ணயித்துள்ளது.
பெங்களூரு அணியின் தொடக்க ஆட்டக்காரர்களாக வெங்கடேஷ் ஐயர் மற்றும் விராட் கோலி ஆகியோர் களம் புகுந்தனர். வெங்கடேஷ் ஐயர் 19 ரன்களில் காகிசோ ரபாடா பந்துவீச்சில் ஆட்டமிழந்தார். அதன் பின்னர் ஜோடி சேர்ந்த விராட் கோலி மற்றும் தேவ்தத் படிக்கல் அதிரடியாக விளையாடி ரன்களை உயர்த்தினர். விராட் கோலி 25 பந்துகளில் 5 சிக்ஸர்கள் மற்றும் 2 பவுண்டரிகளுடன் 43 ரன்களும், தேவ்தத் படிக்கல் 19 பந்துகளில் 30 ரன்களும் எடுத்து ஜேசன் ஹோல்டர் பந்துவீச்சில் அடுத்தடுத்து ஆட்டமிழந்தனர். பவர்பிளேயான முதல் 6 ஓவர்களில் பெங்களூரு அணி 76 ரன்களைக் குவித்தது குறிப்பிடத்தக்கது.
அதன் பிறகு ஜோடி சேர்ந்த கேப்டன் ரஜத் படிதார் மற்றும் குருணால் பாண்டியா அதிரடியின் உச்சத்திற்குச் சென்றனர். குஜராத் அணியின் பந்துவீச்சை நாலாபுறமும் சிதறடித்த இந்த ஜோடி 4-வது விக்கெட்டுக்கு 95 ரன்கள் சேர்த்தது. குருணால் பாண்டியா 28 பந்துகளில் 43 ரன்கள் எடுத்து ரபாடா பந்துவீச்சில் ஆட்டமிழந்தார்.
இறுதிவரை ஆட்டமிழக்காமல் நின்ற கேப்டன் ரஜத் படிதார், மைதானத்தின் அனைத்துப் பக்கங்களிலும் சிக்ஸர் மழை பொழிந்து வெறும் 33 பந்துகளில் 9 சிக்ஸர்கள் மற்றும் 5 பவுண்டரிகளுடன் 93 ரன்கள் குவித்து அசத்தினார். இறுதி ஓவர்களில் டிம் டேவிட் 4 ரன்களில் ஆட்டமிழக்க, ஜித்தேஷ் சர்மா 5 பந்துகளில் 15 ரன்கள் எடுத்து அதிரடி காட்டினார்.
குஜராத் டைட்டன்ஸ் அணியின் பந்துவீச்சைப் பொறுத்தவரை, ஜேசன் ஹோல்டர் மற்றும் காகிசோ ரபாடா ஆகியோர் தலா 2 விக்கெட்டுகளையும், பிரசித் கிருஷ்ணா 1 விக்கெட்டையும் வீழ்த்தினர். இருப்பினும், முகமது சிராஜ் (46 ரன்கள்), காகிசோ ரபாடா (54 ரன்கள்), பிரசித் கிருஷ்ணா (53 ரன்கள்) மற்றும் குல்வந்த் கெஜ்ரோலியா (31 ரன்கள்) ஆகியோர் ஓவருக்கு 13 ரன்களுக்கு மேல் வாரி வழங்கி ரன் குவிப்பைக் கட்டுப்படுத்தத் தவறினர்.
சுழற்பந்து வீச்சாளர் ரஷித் கான் 3 ஓவர்களில் 29 ரன்கள் மட்டுமே விட்டுக்கொடுத்து ஓரளவுக்குக் கட்டுக்கோப்பாகப் பந்துவீசினார். 255 ரன்கள் என்ற இமாலய இலக்கை நோக்கி குஜராத் டைட்டன்ஸ் அணி தற்போது களம் இறங்கியுள்ளது.
