19 வயதுக்குட்பட்டோருக்கான உலகக் கோப்பை இறுதிப்போட்டியில் நாளை இந்தியா – ஆஸ்திரேலிய அணிகள் மோத இருக்கின்றன. முன்னதாக இந்திய அணி அரையிறுதியில் தென்னாப்பிரிக்காவை வீழ்த்தியும், ஆஸ்திரேலியா அணி பாகிஸ்தான் அணியை வீழ்த்தியும் இறுதிப்போட்டிக்கு முன்னேறியது.
இதுவரை 19 வயதுக்குட்பட்டோருக்கான உலகக் கோப்பையை இந்திய அணி 5 முறை வென்றுள்ளது. இது தவிர, 19 வயதுக்குட்பட்டோருக்கான உலகக் கோப்பை கிரிக்கெட் இறுதிப் போட்டியில் இந்திய அணி 8 முறை விளையாடியுள்ளது. அதாவது, இதுவரை 19 வயதுக்குட்பட்டோருக்கான உலகக் கோப்பை கிரிக்கெட் இறுதிப் போட்டியில் இந்தியா 5 முறை சாம்பியன் பட்டத்தையும், 3 முறை இரண்டாம் இடத்தையும் பெற்றுள்ளது. இந்தநிலையில், ஆறாவது முறையாக சாம்பியன் பட்டம் வெல்லும் முனைப்புடன் இந்திய அணி ஆஸ்திரேலியாவுக்கு எதிராக களம் இறங்கவுள்ளது.
ஆறாவது முறையாக சாம்பியன் ஆகுமா இந்திய அணி..?
கடந்த 2000ம் ஆண்டு 19 வயதுக்குட்பட்டோருக்கான உலகக் கோப்பையை முகமது கைஃப் தலைமையிலான இந்திய அணி வென்றது. இதற்கு பிறகு, கடந்த 2006ம் ஆண்டு நடந்த உலகக் கோப்பை போட்டியில் இந்திய அணி இறுதிப்போட்டி வரை சென்று பாகிஸ்தான் அணியிடம் தோல்வியை சந்தித்தது. 2008ம் ஆண்டு விராட் கோலி தலைமையிலான அணி 19 வயதுக்குட்பட்டோருக்கான உலகக் கோப்பையை வென்றது. இதன்பின், 2012ல் இந்திய அணியின் கேப்டன் உன்முக்த் சந்த் தலைமையிலான இந்திய அணி மூன்றாவது முறையாக சாம்பியன் ஆனது. அதனை தொடர்ந்து, இஷான் கிஷான் தலைமையிலான அணி 19 வயதுக்குட்பட்டோருக்கான உலகக் கோப்பை கிரிக்கெட் இறுதிப் போட்டி வரை சென்றாலும் பட்டத்தை வெல்ல முடியவில்லை. வெஸ்ட் இண்டீஸ் அணியிடம் தோல்வியை சந்தித்தது.
2018ம் ஆண்டு 19 வயதுக்குட்பட்டோருக்கான உலகக் கோப்பை கிரிக்கெட் இறுதிப் போட்டிக்கு முன்னேறியது இந்திய அணி. இந்த முறை பிரித்வி ஷா தலைமையிலான இந்திய அணி எந்த தவறும் செய்யாமல், நான்காவது முறையாக சாம்பியன் பட்டத்தை வென்றது. அதனை தொடர்ந்து, கடந்த 2022ம் ஆண்டு நடைபெற்ற 19 வயதுக்குட்பட்டோருக்கான உலகக் கோப்பையை இந்திய அணி ஐந்தாவது முறையாக வென்றது. இந்த இந்திய அணிக்கு யஷ் துல் தலைமை தாங்கி இந்திய அணியை சிறப்பாக வழிநடத்தினார். இந்நிலையில் மீண்டும் இந்திய அணி 19 வயதுக்குட்பட்டோருக்கான உலகக் கோப்பை கிரிக்கெட் இறுதிப்போட்டிக்கு முன்னேறியுள்ளது. இந்த முறை இந்திய அணியின் தலைமை உதய் சஹாரன் கையில் உள்ளது. ஆஸ்திரேலியாவுக்கு எதிரான இறுதிப் போட்டியில் இந்திய அணி வெற்றி பெற்றால், ஆறாவது பட்டத்தை வென்று சாதனை படைக்கும்.
இந்திய அணி இறுதிப்போட்டிக்கு வந்தது எப்படி..?
உதய் சஹாரன் தலைமையிலான இந்திய அணி, 19 வயதுக்குட்பட்டோருக்கான உலகக் கோப்பை போட்டியில் வங்கதேச அணியை வீழ்த்தி தனது முதல் பயணத்தை தொடங்கியது. இதன் பின்னர் அயர்லாந்து, அமெரிக்கா, நியூசிலாந்து, நேபாளம் ஆகிய அணிகளை இந்திய அணி தோற்கடித்தது. அதனை தொடர்ந்து, இந்திய அணி அரையிறுதியில் தென்னாப்பிரிக்கா அணியை 2 விக்கெட் வித்தியாசத்தில் வீழ்த்தி இறுதிப்போட்டிக்கு முன்னேறியது. இதன் மூலம் இந்திய அணி தொடர்ந்து 6 போட்டிகளில் வெற்றி பெற்றுள்ளது.
மற்றொரு அரையிறுதி ஆட்டத்தில் ஆஸ்திரேலிய அணி 1 விக்கெட் வித்தியாசத்தில் பாகிஸ்தானை வீழ்த்தி இறுதிப்போட்டிக்கு முன்னேறியது. முதலில் பேட் செய்த பாகிஸ்தான் அணி 48.5 ஓவர்களில் 179 ரன்கள் எடுத்தது. பதிலுக்கு பேட்டிங் செய்த ஆஸ்திரேலிய அணி 49.1 ஓவர்களில் 9 விக்கெட்டுகளை இழந்து வெற்றி இலக்கை எட்டியது.
Tag: IND vs AUS U19 Final
IND Vs AUS Under19 Cricket World Cup 2024 Here Know Indian Cricket Team Stats Records Latest Tamil Sports News
India Vs Australia U19 Cricket World Cup Final 2024 Date Time Live Streaming Telecast Squads All Details
ஐசிசி நடத்தும் ஒவ்வொரு போட்டியும் கிரிக்கெட் உலகில் கவனம் பெறுகின்றது எனக் கூறினால் அது மிகையாகாது. ஐசிசி நடத்தக்கூடிய ஒருநாள் உலகக் கோப்பை, ஐசிசி டெஸ்ட் கிரிக்கெட் சாம்பியன்ஸ், ஐசிசி டி20 உலகக்கோப்பை போலவே 19வயதுக்குட்பட்டவர்களுக்கான ஐசிசி டி20 உலகக் கோப்பையும், ஐசிசி ஒருநாள் உலகக் கோப்பையும் மிகவும் முக்கியமானதாக பார்க்கப்படுகின்றது.
உலகக்கோப்பை இறுதிப்போட்டி:
இதில் தற்போது நடைபெற்று வரும் 19 வயதுக்குட்பட்டவருக்கான ஐசிசி ஒருநாள் கிரிக்கெட் இறுதிப்போட்டி இறுதி கட்டத்தினை எட்டியுள்ளது. அதில் இந்திய அணியும் ஆஸ்திரேலியா அணியும் வரும் ஞாயிறு அன்று அதாவது பிப்ரவரி 11ஆம் தேதி மோதவுள்ளது. இந்த போட்டி தென்னாப்பிரிக்காவில் உள்ள வில்லோவ்மோர் பார்க் மைதானத்தில் நடைபெறவுள்ளது.
கடந்தாண்டு தோல்வி:
கடந்த ஆண்டில் நடைபெற்ற இரண்டு ஐசிசி கோப்பைக்கான போட்டிகளின் இறுதிப் போட்டியில் இந்தியாவும் ஆஸ்திரேலியாவுமே மோதிக்கொண்டு உள்ளன. அதில் ஆஸ்திரேலியாவே வென்று கோப்பையைக் கைப்பற்றியுள்ளது. கடந்த ஆண்டு ஜூன் மாதம் இங்கிலாந்தில் உள்ள ஓவல் மைதானத்தில் நடைபெற்ற உலக டெஸ்ட் சாம்பியன்ஷிப் இறுதிப் போட்டியில் ஆஸ்திரேலியா அணி 209 ரன்கள் வித்தியாசத்தில் வெற்றி பெற்றது.
இந்த போட்டியில் முதல் இன்னிங்ஸில் ஆஸ்திரேலியா அணி 469 ரன்கள் சேர்த்தது. இந்திய அணி முதல் இன்னிங்ஸில் 296 ரன்களுக்கு ஆல் அவுட் ஆனது. இரண்டாவது இன்னிங்ஸில் ஆஸ்திரேலியா அணி 8 விக்கெட்டுகளை இழந்து 270 ரன்கள் சேர்த்த நிலையில் டிக்ளேர் செய்தது. இதனால் இந்திய அணியின் வெற்றிக்கு 444 ரன்கள் தேவை என்ற நிலையில் களமிறங்கிய இந்திய அணி 234 ரன்களுக்கு ஆல் அவுட் ஆனது. இதனால் ஆஸ்திரேலியா அணி 209 ரன்கள் வித்தியாசத்தில் வெற்றி பெற்றது.
பழிதீர்ப்பார்களா ஜூனியர்ஸ்?
அதன்பின்னர் இந்தியாவில் நடைபெற்ற உலகக் கோப்பை ஒருநாள் கிரிக்கெட் இறுதிப் போட்டியில் இந்தியாவும் ஆஸ்திரேலியாவுமே மோதிக்கொண்டது. இந்த போட்டியில் முதலில் பேட் செய்த இந்திய அணி 50 ஓவர்களுக்கு 240 ரன்கள் சேர்த்தது. அதன் பின்னர் களமிறங்கிய ஆஸ்திரேலியா அணி 4 விக்கெட்டுகளை இழந்து 241 ரன்கள் சேர்த்து வெற்றி பெற்று 6வது முறையாக உலகக் கோப்பையை வென்றது. உலக டெஸ்ட் சாம்பியன்ஷிப் இறுதிப் போட்டியிலும், ஒருநாள் உலகக் கோப்பையிலும் ஆஸ்திரேலியா அணியின் தொடக்க ஆட்டக்காரர் டிராவிஸ் ஹெட் சதம் விளாசி இந்தியாவுக்கு சிம்ம சொப்பனமாக விளங்கினார்.
இந்நிலையில் சீனியர்கள் சந்தித்த அடுத்தடுத்த ஐசிசி கோப்பை போட்டிகளில் இந்திய அணியை வெளிநாட்டு மண்ணிலும் இந்திய மண்ணிலும் வென்று சாதனை படைத்தனர் ஆஸ்திரேலியாவின் சீனியர்களுக்கு இந்திய அணியின் ஜூனியர்கள் பதிலடி கொடுப்பார்களா என்ற கேள்வி எழுந்துள்ளது. இந்திய அணியின் ஜூனியர் வீரர்கள் ஆஸ்திரேலியா அணியின் ஜூனியர் வீரர்களை வீழ்த்தி சாதனை படைத்து இந்திய கிரிக்கெட் ரசிகர்களுக்கு பெரும் நம்பிக்கையை உண்டாக்குவார்களா என்ற கேள்வியும் ரசிகர்கள் மத்தியில் எழுந்துள்ளது. இதனாலே இந்த போட்டி மீது எதிர்பார்ப்பு எகிறியுள்ளது.
