<h2 class="p1"><strong>முதல் டெஸ்டில் தோல்வி அடைந்த இந்திய அணி:</strong></h2>
<p class="p2">இந்திய அணி இங்கிலாந்து அணிக்கு எதிரான<span class="s1"> 5 </span>டெஸ்ட் போட்டிகள் கொண்ட தொடரில் விளையாடி வருகிறது<span class="s1">. </span>இதில்<span class="s1">, </span>முதல் டெஸ்ட் போட்டி கடந்த ஜனவரி<span class="s1"> 25 </span>ஆம் தேதி தொடங்கியது<span class="s1">. </span>இதில் முதல் போட்டியில்<span class="s1"> 28 </span>ரன்கள் வித்தியாசத்தில் இங்கிலாந்து அணி வெற்றி பெற்றது<span class="s1">. </span>இதன் மூலம் தற்போது இங்கிலாந்து அணி<span class="s1"> 1-0 </span>என்ற கணக்கில் முன்னிலையில் உள்ளது<span class="s1">. </span>முன்னதாக<span class="s1">, </span>முதல் இன்னிங்ஸில் இங்கிலாந்து அணி<span class="s1"> 246 </span>ரன்கள் எடுத்தது<span class="s1">. </span>பின்னர் தங்களது முதல் இன்னிங்ஸை தொடங்கிய இந்திய அணி அதிரடியாக விளையாடியது<span class="s1">. </span>அதன்படி<span class="s1">, </span>இந்திய அணி முதல் இன்னிங்ஸில் அனைத்து விக்கெட்டுகளையும் இழந்து<span class="s1"> 426 </span>ரன்களை குவித்தது<span class="s1">. </span>இந்திய அணியின் பந்து வீச்சை பொறுத்த வரை முதல் இன்னிங்ஸில் நன்றாக இருந்தது<span class="s1">. </span>இந்திய அணியின் சுழற்பந்து வீச்சாளர்களான ரவீந்திர ஜடேஜா மற்றும் ரவிச்சந்திரன் அஸ்வின் தலா மூன்று விக்கெட்டுகளை வீழ்த்தி அசத்தினார்கள்<span class="s1">.</span></p>
<p class="p2">இதனைத்தொடர்ந்து இரண்டாவது இன்னிங்ஸை தொடர்ந்த இங்கிலாந்து அணி மிக சிறப்பாக விளையாடியது<span class="s1">. </span>அதன்படி<span class="s1">, </span>அந்த அணி மொத்தம்<span class="s1"> 420 </span>ரன்களை குவித்தது<span class="s1">. </span>அதேநேரம் இரண்டாவது இன்னிங்ஸை பொறுத்த வரை<span class="s1"> 16 </span>ஓவர்கள் மட்டுமே வீசிய ஜஸ்ப்ரித் பும்ரா<span class="s1"> 4 </span>ஓவர்களை மெய்டன் செய்து<span class="s1"> 4 </span>விக்கெட்டுகளை வீழ்த்தினார்<span class="s1">. </span>அதேபோல்<span class="s1">, </span>அஸ்வின்<span class="s1"> 3 </span>விக்கெட்டுகளை வீழ்த்தினார்<span class="s1">.</span></p>
<p class="p2">முன்னதாக<span class="s1">, </span>இந்த வெற்றிக்கு முக்கிய காரணமாக பார்க்கப்படுவது இரண்டாவது இன்னிங்ஸில் அதிரடி சதம் விளாசிய ஒல்லி போப் ஆட்டம் தான்<span class="s1">. </span>இந்திய பந்து வீச்சாளர்களின் பந்துகளை அடித்து நொறுக்கினார்<span class="s1">. </span>அதன்படி<span class="s1"> 278 </span>பந்துகள் களத்தில் நின்ற அவர்<span class="s1"> 21 </span>பவுண்டரிள் உட்பட<span class="s1"> 196 </span>ரன்களை விளாசினார்<span class="s1">.</span></p>
<h2 class="p1"><strong>அவரை பார்த்து கத்துக்கோங்க:</strong></h2>
<p class="p2">இந்நிலையில் ஒல்லி போப் பயன்படுத்தும் பேட்டிங் நுட்பத்தை இந்திய அணியின் பேட்ஸ்மென் சுப்மன் கில் பயன்படுத்த வேண்டும் என்று இந்திய முன்னாள் கிரிக்கெட் வீரர் சஞ்சய் மஞ்ரேக்கர் அறிவுறுத்தியுள்ளார்<span class="s1"> . </span>இது தொடர்பாக பேசிய அவர்<span class="s1">, “</span>போப்<span class="s1"><span class="Apple-converted-space"> </span></span>விளையாடிய விதம் மிகவும் வித்தியாசமாக இருந்தது<span class="s1">.<span class="Apple-converted-space"> </span></span>அதேநேரம் போப் முதல் இன்னிங்ஸில் ஒரு ரன்னில் விக்கெட்டை பறிகொடுத்தார்<span class="s1">. </span>ஆனால்<span class="s1">, </span>இரண்டாவது இன்னிங்ஸில் அவர் ரன்கள் எடுப்பதில் குறியாக இருந்தார்<span class="s1">. </span>அணிக்கு எவ்வாறு ரன்களை பெற்றுத் தர வேண்டும் என்பது அவருக்கு நன்றாக தெரிந்தது<span class="s1">. </span>இதைத்தான் நம்முடைய வீரர் சுப்மன் கில் பயன்படுத்த வேண்டும் என்று நான் நினைக்கிறேன்<span class="s1">. </span>ஏனென்றால் அவர் இறங்கி ஆட முயற்சி செய்கிறார்<span class="s1">. </span></p>
<p class="p2">அதனால்தான் நான் இதைச் சொல்கிறேன்<span class="s1">”</span>என்று கூறியுள்ளார். முன்னதாக கடந்த<span class="s1"> 10 </span>இன்னிங்ஸில் ஒரு அரைசதம் கூட அடிக்காமல் சுப்மன் கில் திணறிவருகிறார்<span class="s1">. </span>அதேபோல்<span class="s1">, </span>இந்த முதல் டெஸ்ட் போட்டியிலும் முதல் இன்னிங்ஸில்<span class="s1"> 23 </span>ரன்களும் இரண்டாவது இன்னிங்ஸில் டக் அவுட் முறையிலும் வெளியேறினார்<span class="s1">. </span>இதனால் அவருக்கான டெஸ்ட் எதிர்காலம் அச்சத்தை ஏற்படுத்துவது போல் உள்ளது என்று இந்திய அணியின் முன்னாள் வீரர்கள் கூறி வரும் சூழலில் சஞ்சன் மஞ்ச்ரேக்கர் சுப்மன் கில்லுக்கு பேட்டிங் குறித்து அறிவுறுத்தியிருப்பது கவனிக்கத்தக்க ஒன்றாக உள்ளது.</p>
<p class="p2"><span class="s1">மேலும் படிக்க:<a title="IND vs ENG Test: பென் ஸ்டோக்ஸ் விக்கெட்டை காலிசெய்த அஸ்வின்… கபில் தேவ் சாதனை சமன்! விவரம் இதோ!" href="https://tamil.abplive.com/sports/cricket/ind-vs-eng-1st-test-day-3-ashwin-also-equalled-the-record-of-the-great-kapil-dev-of-an-indian-bowler-dismissing-a-batter-most-often-in-tests-164216" target="_blank" rel="dofollow noopener">IND vs ENG Test: பென் ஸ்டோக்ஸ் விக்கெட்டை காலிசெய்த அஸ்வின்… கபில் தேவ் சாதனை சமன்! விவரம் இதோ!</a></span></p>
<p class="p2">மேலும் படிக்க:<a title="IND vs ENG Test: இரண்டாவது இன்னிங்ஸில் இந்தியா சொதப்பல் பேட்டிங்; 28 ரன்கள் வித்தியாசத்தில் இங்கிலாந்து வெற்றி" href="https://tamil.abplive.com/sports/cricket/ind-vs-eng-1st-test-england-beat-india-first-test-by-28-runs-rajiv-gandhi-international-stadium-hyderabad-164388" target="_blank" rel="dofollow noopener">IND vs ENG Test: இரண்டாவது இன்னிங்ஸில் இந்தியா சொதப்பல் பேட்டிங்; 28 ரன்கள் வித்தியாசத்தில் இங்கிலாந்து வெற்றி</a></p>
<p class="p1"> </p>