<p><em><strong>ப்ரோ கபடி லீக் சீசன் 10ன் 94வது போட்டியில் இன்று தமிழ் தலைவாஸ் அணி யு மும்பா அணியை சந்திக்கிறது.</strong></em></p>
<p>ப்ரோ கபடி லீக் சீசன் 10 இன் 94வது போட்டியில் தமிழ் தலைவாஸ் அணி (ஜனவரி 28) இன்று யு மும்பா அணியை எதிர்கொள்கிறது. இப்போட்டியானது பாட்னாவில் உள்ள பாட்லிபுத்ரா உள்விளையாட்டு மைதானத்தில் இந்திய நேரப்படி இரவு 9 மணிக்கு தொடங்குகிறது. </p>
<h2><strong>இரு அணிகளும் கடந்த போட்டியில் எப்படி..? </strong></h2>
<p>கடந்த ஜனவரி 24ம் தேதி தெலுங்கு டைட்டன்ஸ் அணிக்கு எதிரான வெற்றிக்குப் பிறகு தமிழ் தலைவாஸ் அணி இன்றைய போட்டியில் மோத தயாராக உள்ளது. கடந்த போட்டியில் தமிழ் தலைவாஸ் அணி 54-29 என்ற கணக்கில் தெலுங்கு டைட்டன்ஸ் அணியை வீழ்த்தியது. இது ப்ரோ கபடி லீக் சீசன் 10 இல் தமிழ் தலைவாஸ் அணியின் ஆறாவது வெற்றியாகும்.</p>
<p>இதற்கிடையில், யு மும்பா கடந்த ஜனவரி 26ம் தேதி குஜராத் ஜெயண்ட்ஸுக்கு எதிரான கடைசி ஆட்டத்தில் 35-44 என்ற கணக்கில் தோல்வியடைந்தது.</p>
<h2><strong>தமிழ் தலைவாஸ் – யு மும்பா அணிகள் இதுவரை நேருக்குநேர்: </strong></h2>
<p><br />ப்ரோ கபடி லீக் வரலாற்றில் தமிழ் தலைவாஸ் அணி இதுவரை 10 முறை யு மும்பா அணியை எதிர்கொண்டுள்ளது. இது தமிழ் தலைவாஸ் அணிக்கு எதிராக 7 வெற்றிகளுடன் யு மும்பா அணி முன்னிலையில் உள்ளது. இந்த அணிகளுக்கு இடையேயான ஒரு போட்டி டையில் முடிந்த நிலையில், தமிழ் தலைவாஸ் 2 முறை வெற்றி பெற்றுள்ளது.</p>
<p>முன்னதாக தமிழ் தலைவாஸ் மற்றும் யு மும்பா அணிகளுக்கு இடையேயான சீசன் 10ல் நடந்த போட்டியில் யு மும்பா அணி, தமிழ் தலைவாஸ் அணியை 46-33 என்ற கணக்கில் வீழ்த்தியது குறிப்பிடத்தக்கது. </p>
<p>15 போட்டிகளுக்குப் பிறகு, ப்ரோ கபடி லீக் சீசன் 10 புள்ளிகள் பட்டியலில் தமிழ் தலைவாஸ் 10வது இடத்தில் உள்ளது. இதுவரை 6 முறை வெற்றியும் 9 தோல்வியும் அடைந்து 35 புள்ளிகளை குவித்துள்ளது. மறுபுறம், யு மும்பா 6 போட்டிகளில் வெற்றி, 7 தோல்வி, 2 டையில் விளையாடி ஏழாவது இடத்தில் உள்ளது. அவர்கள் மொத்தம் 40 புள்ளிகள் பெற்றுள்ளனர்.</p>
<h2><strong>தமிழ் தலைவாஸ் vs யு மும்பா அணியில் சிறந்த வீரர்கள் யார் யார்..? </strong></h2>
<p><strong>தமிழ் தலைவாஸ்:</strong></p>
<p>14 போட்டிகளில் 110 ரெய்டு புள்ளிகளுடன், நரேந்தர் தமிழ் தலைவாஸ் ரெய்டிங் பிரிவில் கலக்கி வருகிறார். இவர் தெலுங்கு டைட்டன்ஸ் அணிக்கு எதிரான தனது கடைசி ஆட்டத்தில் 10 ரெய்டு புள்ளிகளைப் பெற்றார்.</p>
<p>இதற்கிடையில், தமிழ் தலைவாஸின் டிபென்ஸ் பிரிவில் கேப்டன் சாகர் ரதி 14 போட்டிகளில் 58 டிபென்ஸ் புள்ளிகளைப் பெற்று அசத்தியுள்ளார். இதுவரை 25 புள்ளிகள் குவித்துள்ள ஹிமான்ஷு அணியில் முதல் ஆல்ரவுண்டர் ஆவார்.</p>
<p><strong>யு மும்பா:</strong></p>
<p>யு மும்பா அணியை பொறுத்தவரை, குமன் சிங் அந்த அணியில் முக்கிய ரைடராக இருப்பார். குமன் சிங் 15 போட்டிகளில் 139 ரெய்டு புள்ளிகளை அடித்துள்ளார். இதில் 13 டூ ஆர் டை ரெய்டு புள்ளிகளும் அடங்கும்.</p>
<p>சுரிந்தர் சிங் 15 போட்டிகளில் 28 டிபென்ஸ் புள்ளிகளைப் பெற்ற அணியிலிருந்து சிறந்த டிபென்டராகவும், அமீர்முகமது ஜஃபர்தனேஷ் 14 ஆட்டங்களில் 108 புள்ளிகளுடன் யு மும்பா அணியில் முதல் ஆல்ரவுண்டராகவும் உள்ளார்.</p>