Last Updated:
ஃபிஃபா 2026 உலகக் கோப்பையின் மொத்தப் பரிசுப் பணத்தைக் கொண்டு, சுமார் 65 டி20 உலகக் கோப்பைத் தொடர்களை நடத்தி முடித்துவிடலாம்.
உலகின் மிகப்பெரிய விளையாட்டுத் திருவிழாவான 2026 ஃபிஃபா உலகக் கோப்பை (FIFA World Cup 2026) ஜூன் 11 முதல் தொடங்கவுள்ள நிலையில், இந்த முறை அது முன்னெப்போதையும் விட மிகப் பிரம்மாண்டமாக அமையவுள்ளது.
இம்முறை வரலாற்றிலேயே முதல் முறையாக 48 அணிகள் பங்கேற்கின்றன. மூன்று நாடுகள் (அமெரிக்கா, கனடா, மெக்சிகோ) இணைந்து நடத்தும் இந்தத் தொடரில், 16 மைதானங்களில் 39 நாட்களில் 104 போட்டிகள் நடைபெற உள்ளன. 1998-ஆம் ஆண்டுக்குப் பிறகு இந்தத் தொடர் இவ்வளவு பெரிய அளவில் விரிவாக்கப்படுவது இதுவே முதல் முறையாகும்.இந்த பிரம்மாண்டத்திற்கு இணையாக, இதற்கான பரிசுத்தொகையையும் ஃபிஃபா (FIFA) அமைப்பு பன்மடங்கு உயர்த்தியுள்ளது.
இந்தத் தொடருக்காகச் சாதனை அளவாக 727 மில்லியன் டாலர் ஒப்புதல் அளிக்கப்பட்டுள்ளது. இதில் பங்கேற்கும் 48 அணிகளுக்கு மட்டும் பகிர்ந்தளிக்கப்படும் மொத்தப் பரிசுத்தொகை 655 மில்லியன் டாலர்கள் (சுமார் 6,243.6 கோடி ரூபாய்) ஆகும்.
இது கடந்த உலகக் கோப்பையை விட 50 சதவீதம் அதிகமாகும். இத்தொடரில் சாம்பியன் பட்டம் வெல்லும் அணிக்கு $50 மில்லியனும், இரண்டாம் இடம் பிடிக்கும் அணிக்கு 33 மில்லியன் டாலரும் வழங்கப்படும்.மிக முக்கியமாக, தகுதி பெற்று 33 முதல் 48 இடங்களுக்குள் வரும் அணிகளுக்குக் கூட தலா 9 மில்லியன் டாலர் பரிசுத்தொகையும், தயாரிப்புச் செலவாக 1.5 மில்லியன் டாலர் சேர்த்து, குறைந்தபட்சம் 10.5 மில்லியன் டாலர் (சுமார் ரூ. 87 கோடி) உறுதி செய்யப்பட்டுள்ளது.
கால்பந்து விளையாட்டின் இந்த அசுரத்தனமான பொருளாதார மதிப்பை கிரிக்கெட்டுடன் ஒப்பிடும்போதுதான் இதன் உண்மையான பிரம்மாண்டம் விளையாட்டு ரசிகர்களுக்கு வியப்பை ஏற்படுத்துகிறது.
சமீபத்தில் நடந்து முடிந்த 2026 ஐசிசி டி20 உலகக் கோப்பை தொடரின் மொத்தப் பரிசுத் தொகையே 11.25 மில்லியன் டாலர்கள் மட்டும்தான்.அதில் சாம்பியன் பட்டம் வென்ற இந்திய அணிக்குக் கிடைத்த பரிசுத்தொகை 2.6 மில்லியன் டாலர்கள் (சுமார் ரூ. 26 கோடி) ஆகும்.
அதாவது, ஃபிஃபா உலகக் கோப்பையில் பங்கேற்று கடைசி இடங்களைப் பிடிக்கும் கடைசி அணிக்குக் கிடைக்கும் குறைந்தபட்சத் தொகையான 10.5 மில்லியன் டாலர் என்பது, ஒட்டுமொத்த டி20 உலகக் கோப்பையின் மொத்த பட்ஜெட்டிற்கு (11.25 மில்லியன் டாலர்) சமமாக உள்ளது.
ஃபிஃபா 2026 உலகக் கோப்பையின் மொத்தப் பரிசுப் பணத்தைக் கொண்டு, சுமார் 65 டி20 உலகக் கோப்பைத் தொடர்களை நடத்தி முடித்துவிடலாம்.
உலகெங்கிலும் உள்ள 200-க்கும் மேற்பட்ட நாடுகளால் விளையாடப்படும் உலகளாவிய பரப்பளவு, பில்லியன் கணக்கான ரசிகர்களின் பேராதரவு, சர்வதேச நிறுவனங்களின் விளம்பர முதலீடுகள் மற்றும் அசுரவளர்ச்சி கொண்ட வணிகச் சந்தை ஆகியவையே கிரிக்கெட்டை விட கால்பந்து விளையாட்டுக்கு உலகில் இவ்வளவு மாபெரும் மோகமும் மதிப்பும் இருக்கக் முதன்மைக் காரணங்கள் என்று நிபுணர்கள் தெரிவிக்கின்றனர்.
