PM Modi On Mutton Eating : "மக்களின் உணர்வுகளை புண்படுத்துறாங்க" மட்டன் சாப்பிட்ட ராகுல் காந்தி.. சாடும் பிரதமர் மோடி

<p><strong>ஆட்டிறைச்சி சாப்பிட்ட காங்கிரஸ் முன்னாள் தலைவர் ராகுல் காந்தி, பீகார் மாநிலத்தின் முன்னாள் முதலமைச்சர் லாலு பிரசாத் யாதவ் உள்ளிட்ட I.N.D.I.A. கூட்டணி தலைவர்களை பிரதமர் மோடி விமர்சித்துள்ளார்.</strong></p>
<p><strong>பெரும் எதிர்பார்ப்புகளுக்கு மத்தியில் வரும் 19-ஆம் தேதி, நாடாளுமன்ற மக்களவை தேர்தல் தொடங்குகிறது. மொத்தம் 7 கட்டங்களாக நடைபெறும் தேர்தல் ஜூன் 1-ஆம் தேதியுடன் நிறைவடைகிறது. தேர்தலில் பதிவான வாக்குகள் ஜூன் 4-ஆம் தேதி எண்ணப்பட்டு முடிவுகள் அன்றே அறிவிக்கப்பட உள்ளது.</strong></p>
<h2><strong>மட்டன் சாப்பிட்ட விவகாரத்தை விமர்சிக்கும் பிரதமர்:</strong></h2>
<p>தொடர்ந்து மூன்றாவது முறையாக ஆட்சியை கைப்பற்றிவிட வேண்டும் என்ற எண்ணத்தில் பாஜக தலைவர்கள் தீவிர பிரச்சாரத்தில் ஈடுபட்டு வருகின்றனர். இந்த நிலையில், பிரதமர் மோடி உணவு அரசியலை கையில் எடுத்துள்ளார்.</p>
<p>ஆட்டிறைச்சி சாப்பிட்ட காங்கிரஸ் முன்னாள் தலைவர் ராகுல் காந்தி, பீகார் மாநிலத்தின் முன்னாள் முதலமைச்சர் லாலு பிரசாத் யாதவ் உள்ளிட்ட I.N.D.I.A. கூட்டணி தலைவர்களை பிரதமர் மோடி விமர்சித்துள்ளார். <strong>மட்டன் சாப்பிட்டதன் மூலம் பெரும்பான்மையான மக்களின் உணர்வுகளை புண்படுத்தி உள்ளதாக குற்றம் சுமத்தியுள்ளார்.</strong></p>
<p>ராகுல் காந்தி, லாலு பிரசாத் யாதவ் என பெயர் குறிப்பிடாமல் அவர்களை மறைமுகமாக முகலாயர்களுடன் ஒப்பிட்டு பேசிய பிரதமர் மோடி, "நாட்டின் பெரும்பான்மையான மக்களின் உணர்வுகளைப் பற்றி காங்கிரஸ் மற்றும் இந்தியா கூட்டணி தலைவர்கள் கவலைப்படுவதில்லை. மக்களின் உணர்வுகளுடன் விளையாடி மகிழ்கிறார்கள்&rdquo; என்றார்</p>
<h2><strong>"நாட்டு மக்களை கிண்டல் செய்யும் இந்தியா கூட்டணி"</strong></h2>
<p>&rdquo;நீதிமன்றத்தால் தண்டனை பெற்று ஜாமீனில் இருக்கும் ஒரு குற்றவாளியின் வீட்டுக்குச் சென்று சாவன் மாதத்தில் ஆட்டிறைச்சி சமைத்து உண்டு மகிழ்ந்துள்ளார்கள். நாட்டு மக்களைக் கிண்டல் செய்ய வீடியோ எடுக்கிறார்கள்" என்றார்.</p>
<p>கடந்த ஆண்டு செப்டம்பர் மாதம் வெளியான வைரல் வீடியோ ஒன்றில் லாலு பிரசாத் யாதவும் ராகுல் காந்தியும் ஒன்றாக ஆட்டிறைச்சி சமைத்திருந்தனர். இந்த வீடியோ குறிப்பிட்டுதான் பிரதமர் மோடி சாடியுள்ளார்.</p>
<p>ஜம்மு காஷ்மீர் மாநிலம் உத்தம்பூரில் பிரச்சாரத்தின்போது இதுகுறித்து பேசிய பிரதமர் மோடி, "சட்டம் யாரையும் எதையும் சாப்பிட கூடாது என தடுக்கவில்லை. ஆனால், இவர்களின் எண்ணம் வேறு. முகலாயர்கள் தாக்கியபோது, ​​கோவில்களை இடிக்கும் வரை அவர்களுக்கு திருப்தி ஏற்படவில்லை.</p>
<p>அதனால் முகலாயர்களைப் போலவே சாவன் மாதத்தில் வீடியோவைக் காட்டி நாட்டு மக்களைக் கிண்டல் செய்ய நினைக்கிறார்கள்" என்றார். சமீபத்தில், மீன் சாப்பிடும் வீடியோவை லாலு பிரசாத் யாதவின் மகனும் பீகார் மாநில முன்னாள் துணை முதலமைச்சருமான தேஜஸ்வி யாதவ் பதிவிட்டிருந்தார்.</p>
<p>இதை சாடிய பிரதமர் மோடி, "நவராத்திரி மாதத்தில், அசைவ உணவுகளை உண்ணும் இந்த வீடியோக்களைக் காட்டி, மக்களின் உணர்வுகளைப் புண்படுத்தி, யாரைக் கவரப் பார்க்கிறீர்கள்?" என்றார்.</p>
<p>அயோத்தி ராமர் கோயில் விவகாரத்தில் காங்கிரஸ் கட்சியை விமர்சித்த பிரதமர், "<strong>ராமர் கோயில் என்பது பாஜகவுக்கு தேர்தல் பிரச்னை என்று காங்கிரஸ் கூறுகிறது. ராமர் கோயில் ஒருபோதும் தேர்தல் பிரச்னையாக இருந்ததில்லை. </strong><strong>அது ஒரு தேர்தல் பிரச்னையாக மாறாது என்பதை நான் சொல்ல விரும்புகிறேன். பாஜக தொடங்கப்படுவதற்கு முன்பே ராமர் கோயில் போராட்டம் நடந்து கொண்டிருக்கிறது. அந்நிய படையெடுப்பாளர்கள் நமது கோவில்களை அழித்தபோது, ​​இந்திய மக்கள் தங்கள் மத ஸ்தலங்களை காப்பாற்ற போராடினார்கள்.</strong></p>
<p><strong>ஆனால், காங்கிரசின் தலைவர்களும் அதன் கூட்டணி கட்சியினரும் பெரிய பங்களாக்களில் வசித்து வந்தனர். ராமர் கோயில் என வரும்போது, பின் முதுகை காட்டி அவர்கள் ஓடிவிட்டனர்</strong>" என்றார்.</p>

Source link