<p>மறைந்த பிரபல பின்னணி பாடகர் மலேசியா வாசுதேவனின் 13 ஆம் ஆண்டு நினைவு தினம் இன்று அனுசரிக்கப்படுகிறது. இதனை முன்னிட்டு ரசிகர்கள் அவர் குறித்த நினைவுகளை சமூக வலைத்தளங்களில் பகிர்ந்து வருகின்றனர்.&nbsp;</p>
<p>தமிழ் சினிமாவில் யாரேனும் சிலர் ஜாம்பவன்களாக வலம் வந்து கொண்டிருக்கும்போது தான் சிலர் சத்தமே இல்லாமல் சம்பவம் செய்வார்கள். அதில் மிக முக்கியமானவர் மலேசியா வாசுதேவன். மறைந்த பிரபல பாடகர் எஸ்.பி.பாலசுப்பிரமணியம் புகழ்பெற்று திகழ்ந்த காலக்கட்டத்தில் முளைத்த தனித்துவமான குரல் &nbsp;மலேசியா வாசுதேவனுடையது தான்.&nbsp;</p>
<p>பாரதிராஜா தொடங்கி ரஜினி, ஸ்ரீதேவி என பலருக்கும் படிக்கல்லாய் அமைந்த 16 வயதினிலே படம் தான் மலேசியா வாசுதேவனுக்கும் அதிர்ஷ்ட கதவாக அமைந்தது. அப்படத்தில் இடம் பெற்ற &lsquo;செவ்வந்திப் பூ முடிச்ச&rsquo; , &lsquo;ஆட்டுக்குட்டி முட்டையிட்டு&rsquo; பட பாடல்களை பாடி ரசிகர்களை கவர்ந்தார் இந்த மலேசியா வாசுதேவன். அதன்பின்னர் &lsquo;கோவில்மணி ஓசை தன்னைக் கேட்டதாரோ&rsquo; பாடலும். &lsquo;வான் மேகங்களே&hellip; வாழ்த்துகள் பாடுங்கள்’ என்ற பாடலும் அவரை எட்டா உயரத்துக்கு அழைத்து சென்று நிதர்சனம். எந்த பாடல் கொடுத்தாலும் மனிதர் பிரித்து மேய்ந்து விடுவார்.&nbsp;</p>
<h2><strong>பிரபலமான பாடல்கள்</strong></h2>
<ul>
<li>மாரியம்மா மாரியம்மா (கரகாட்டக்காரன்)</li>
<li>காதல் வைபோகமே (சுவர் இல்லாத சித்திரங்கள்)</li>
<li>பூங்காற்று திரும்புமா (முதல் மரியாதை)</li>
<li>பூவே இளைய பூவே (கோழி கூவுது)</li>
<li>பேர் வச்சாலும் (மைக்கேல் மதன காமராஜன்)</li>
<li>பொதுவாக என் மனசு தங்கம் (முரட்டுக்காளை)</li>
<li>தங்கச்சங்கிலி மின்னும் பைங்கிளி (தூறல் நின்னு போச்சு)</li>
<li>ஒரு தங்க ரத்தத்தில் (தர்ம யுத்தம்)</li>
<li>இந்த மின்மினிக்குக் கண்ணில் ஒரு மின்னல் &nbsp;(சிகப்பு ரோஜாக்கள்)</li>
<li>ஆயிரம் மலர்களே மலருங்கள் (நிறம் மாறாத பூக்கள்)</li>
<li>ஒரு கூட்டு கிளியாக (படிக்காதவன்)</li>
<li>ஆசை நூறுவகை (அடுத்த வாரிசு)</li>
<li>ஆட்டுக்குட்டி முட்டையிட்டு பாடல் (16 வயதினிலே)</li>
</ul>
<p>என எண்ணற்ற பாடல்களை மலேசியா வாசுதேவன் பாடியுள்ளார்.&nbsp;</p>
<h2><strong>நடிகராகவும் மலேசியா வாசுதேவன்</strong></h2>
<p>1977 ஆம் ஆண்டு அவர் எனக்கே சொந்தம் என்ற படத்தின் மூலம் நடிக்க வந்த மலேசியா வாசுதேவன் அதன்பிறகு ரஜினி, கமல்,விஜய், விஜயகாந்த், &nbsp;ராமராஜன் என ஏகப்பட்ட முன்னணி நடிகர்களின் படங்களில் வில்லன் கலந்த மிக முக்கியமான கேரக்டர்களில் நடித்துள்ளார். இவரின் மகன் தான் பிரபல நடிகரான யுகேந்திரன் வாசுதேவன். பிரபல பின்னணி பாடகரான இவர் <a title="விஜய்" href="https://tamil.abplive.com/topic/vijay" data-type="interlinkingkeywords">விஜய்</a> நடித்த யூத் மற்றும் பகவதி, அஜித் நடித்த பூவெல்லாம் உன் வாசம் உள்ளிட்ட படங்களில் நடித்திருக்கிறார். சமீபத்தில் நடந்து முடிந்த பிக்பாஸ் சீசன் 7 நிகழ்ச்சியில் ஒருவராக கலந்து கொண்டு மக்களிடையே மிகவும் பரீட்சையமானார்.&nbsp;</p>
<p>ஏற்கனவே நீரிழிவு மற்றும் உயர் ரத்த அழுத்தம் பிரச்சினையால் நிகழ்ந்த பக்கவாத பாதிப்பால் மலேசியா வாசுதேவன் பாதிக்கப்பட்டார். பல ஆண்டுகளாக சிகிச்சைப் பெற்று வந்த அவர் குடலிறக்க பிரச்சினை காரணமாக 2011 &nbsp;ஆம் ஆண்டு பிப்ரவரி 20 ஆம் தேதி இறந்தார். மலேசியா வாசுதேவன் மறைந்து ஒரு டஜன் ஆண்டுகள் ஆகிவிட்டாலும் அந்த காந்த குரலோன் நம்மிடையே ஒலிக்கொண்டிருப்பார்.&nbsp;</p>

Source link