விறகுக்கு இரையாக இருந்த ஆல மரங்கள்! – 200 கிலோமீட்டர் லாரிகளில் எடுத்து வந்து உயிர் கொடுத்த உள்ளங்கள் \ man transported and gave new life to Banyan trees which destined to become firewood | ACTPnews.com

மக்கள் தொகை பெருக்கத்திற்கேற்ப இந்தியா முழுவதும் போடப்படும் சாலைகள் மற்றும் தேசிய நெடுஞ்சாலைகளுக்காக, லட்சக்கணக்கான பழமையான மரங்கள் நாள்தோறும் வெட்டி வீழ்த்தப்படுகின்றன. அவற்றில் 80% மரங்கள் நூறு ஆண்டுகளுக்கும் மேலானவை என்பதுதான் வலிநிறைந்த துயரம்.

ஒரு வளர்ந்த மரத்தை வெட்டினால் அதற்கு பதிலாகக் குறைந்தபட்சம் பத்து மரக்கன்றுகளை நட்டுப் பராமரிக்க வேண்டும் என்று நீதிமன்றங்களும், தேசிய பசுமைத் தீர்ப்பாயமும் தொடர்ச்சியாக வலியுறுத்தி வருகின்றன.

ஆனால் நூறு ஆண்டுகளைக் கடந்த மரங்களைக்கூட யோசிக்காமல் வெட்டி வீழ்த்திவிடும் நெடுஞ்சாலைத்துறை, அதற்கு ஈடாக மரக்கன்றுகளை நட்டு வளர்க்க வேண்டும் என்று யோசிப்பதில்லை என்பது இயற்கை ஆர்வலர்களின் நீண்டநாள் குற்றச்சாட்டு.

அதேபோல எவ்வளவு பெரிய மரங்களானாலும் அவற்றை வேருடன் பிடுங்கி, வேறு ஒரு இடத்தில் நடுவதற்கான தொழில்நுட்பங்களும், வசதிகளும் வந்துவிட்ட நிலையில், மத்திய மாநில அரசுகள் அதைச் செயல்படுத்த வேண்டும் என்பதும் இயற்கை ஆர்வலர்களின் கோரிக்கை.

ஆனால் நாட்டின் வளர்ச்சி குறித்துப் பேசும் அரசுகள், இயற்கையின் வீழ்ச்சி குறித்துப் பேசுவதில்லை. இந்தச் சூழலில்தான் நெடுஞ்சாலைத்துறையால் வெட்டப்பட இருந்த ஏழு மரங்களை நவீன தொழில்நுட்பம் மற்றும் நண்பர்கள் உதவியுடன், மீட்டிருக்கிறார் கடலூர் மாவட்டம் சிதம்பரத்தைச் சேர்ந்த தரணி திருவேங்கடம்.

சென்னையில் தொழிற்சாலைகளுக்கு ஜெனரேட்டர்களை வாடகைக்கு விடும் நிறுவனத்தை தரணி திருவேங்கடம் நடத்தி வருகிறார். தொழில் தொடர்பாக சென்னையில் இருந்து ராணிப்பேட்டை நோக்கிச் சென்று கொண்டிருந்தார்.