<h2 class="p1"><strong>இந்தியா – இங்கிலாந்து டெஸ்ட்:</strong></h2>
<p class="p2">இந்திய அணி இங்கிலாந்து அணிக்கு எதிரான<span class="s1"> 5 </span>டெஸ்ட் போட்டிகள் கொண்ட தொடரில் விளையாடி வருகிறது<span class="s1">. </span>இதில்<span class="s1">, </span>முதல் டெஸ்ட் போட்டி கடந்த ஜனவரி<span class="s1"> 25 </span>ஆம் தேதி தொடங்கியது<span class="s1">. </span>இதில் முதல் போட்டியில்<span class="s1"> 28 </span>ரன்கள் வித்தியாசத்தில் இங்கிலாந்து அணி வெற்றி பெற்றது<span class="s1">. </span>இதன் மூலம் தற்போது இங்கிலாந்து அணி<span class="s1"> 1-0 </span>என்ற கணக்கில் முன்னிலையில் உள்ளது<span class="s1">. </span>முன்னதாக கடந்த<span class="s1"> 2012 </span>ஆம் ஆண்டிற்கு பிறகு இந்தியாவை டெஸ்ட் தொடரில் இங்கிலாந்து வீழ்த்தியது இல்லை<span class="s1">.<span class="Apple-converted-space"> </span></span>இச்சூழலில்தான் இந்த முறை எப்படியும் இந்திய அணியை அதன் சொந்த மண்ணில் வீழ்த்தி சாதனை படைக்க வேண்டும் என்பதில் இங்கிலாந்து அணி குறிக்கோளாக இருக்கிறது<span class="s1">. </span>அதற்கான எடுத்துக்காட்டு தான் முதல் டெஸ்ட் போட்டி என்பது போல் அந்த அணி வீரர்கள் கூறிவருகின்றனர்<span class="s1">. </span>அதிலும் குறிப்பாக சொல்லவேண்டும் என்றால் அந்த அணியினருக்கே உரித்தான பாஸ்பால் எனும் அதிரடி ஆட்ட யுக்தியை இந்திய அணிக்கு எதிராக பயன்படுத்துகின்றனர்<span class="s1">. </span></p>
<p class="p2">முன்னதாக<span class="s1">, </span>பாகிஸ்தான் மண்ணில் நடைபெற்ற டெஸ்ட் தொடரில் இதே யுக்தியை பயன்படுத்தித்தான் அந்த அணி ஒயிட் வாஷ் முறையில் வெற்றி பெற்றது<span class="s1">. </span></p>
<h2 class="p1"><strong>இந்திய அணியை வீழ்த்துவோம்:</strong></h2>
<p class="p2">இந்நிலையில்தான்<span class="s1"> 2 </span>வது டெஸ்ட் போட்டி பிப்ரவரி<span class="s1"> 2-</span>ஆம் தேதி கேரள மாநிலம் விசாகப்பட்டினத்தில் நடைபெற இருக்கிறது<span class="s1">.<span class="Apple-converted-space"> </span></span>இதனிடையே இங்கிலாந்து அணியின் முன்னாள் வீரரும்<span class="s1">, </span>இந்திய வம்சாவளியைச் சேர்ந்தவருமான மாண்டி பனேசர் இந்த முறை இந்திய அணியை தங்கள் அணி<span class="s1"> 5-0 </span>என்ற கணக்கில் வீழ்த்தி மாபெரும் சாதனை படைக்கும் என்று கூறியுள்ளார்<span class="s1">. </span></p>
<p class="p2">இது தொடர்பாக அவர் பேசுகையில்<span class="s1">, “ </span>நான் சொல்வது நிச்சயம் நடக்கும்<span class="s1">. </span>அதேநேரம் ஒல்லி போல் மற்றும்<span class="s1"><span class="Apple-converted-space"> </span></span>டாம் ஹார்ட்லி இதே போல் விளையாட வேண்டும்<span class="s1">. </span>அப்படி அவர்கள் விளையாடினால் இந்திய அணியை<span class="s1"> 5-0 </span>என்ற கணக்கில் வீழ்த்த முடியும்<span class="s1">. </span>முதல் டெஸ்டில் இங்கிலாந்துக்கு மிகப்பெரிய வெற்றி கிடைத்திருக்கிறது<span class="s1">. </span>இப்படி நடக்கும் என்று யாருமே எதிர்பார்க்கவில்லை<span class="s1">. 190 </span>ரன்கள் இந்திய அணி முன்னிலை பெற்ற நிலையில் இங்கிலாந்து அணி நிச்சயம் தோற்கும் என்றுதான் அனைவரும் எதிர்பார்த்தார்கள்<span class="s1">. </span>ஆனால்<span class="s1">, </span>ஒல்லி போப் சிறந்த இன்னிங்ஸ் ஒன்றை விளையாடி இருக்கிறார்<span class="s1">. </span>இப்படிப்பட்ட ஒரு ஆட்டத்தைப் பார்த்து ரொம்ப நாட்கள் ஆகிவிட்டது<span class="s1">. </span></p>
<h2 class="p2"><strong>விராட் கோலி இருந்திருந்தால்:</strong></h2>
<p class="p2">இங்கிலாந்தின் ஆட்டத்தை பார்த்து என்ன செய்வது என்று தெரியாமலே ரோஹித் சர்மா நின்றார்<span class="s1">. </span>இங்கிலாந்து வீரர்கள் சுதந்திரமாக ஆடுவதை முதலில் இந்திய அணி நிறுத்த வேண்டும்<span class="s1">. </span>இதுவே விராட் கோலி விளையாடி இருந்தால் அவர் இங்கிலாந்து அணி வீரர்களிடம் சென்று வம்பு இழுத்து இருப்பார்<span class="s1">. </span>ஏதேனும் பேசி அவர்களுடைய கவனத்தை சிதைத்து இருப்பார்<span class="s1">. </span>எங்கே மீண்டும் இதே போல் விளையாடி எங்கே இந்த ஷாட்டை திரும்பி அடி என்று இங்கிலாந்து வீரர்களிடம் கேட்டிருப்பார். <span class="s1"> </span>வெளிநாட்டு மண்ணில் இங்கிலாந்து அணி பெரும் மிகப்பெரிய வெற்றியாக முதல் டெஸ்ட் போட்டியை நான் கருதுகிறேன்<span class="s1">. </span>இது இங்கிலாந்தில் மிகப்பெரிய செய்தியாக மாறி இருக்கிறது<span class="s1">. </span>நாங்கள் அனைவரும் ஏதோ உலக கோப்பையை வென்றதுபோல் மகிழ்ச்சியாக இருக்கிறோம்<span class="s1">” </span>என்று கூறியுள்ளார்<span class="s1">.</span></p>